Шинэ мэдээ
Орон сууц
Хамгийн ...
Мэдээ, нийтлэл
Хэрэгцээт линкүүд
Бидний тухай
Барилгын компаниуд
Мэдээ мэдээлэл
Дахин төлөвлөлтийн эргэн тойронд
2013 оны 4 сарын 17

 

 

Гэр хорооллыг орон сууцжуулах ажилд оролцооч гэж нийслэлийн зүгээс компаниудыг урьж уулзаж байсан үеийг бодвол ажил хийгдээд эхлэх нь эхэлсэн. Урилгын дагуу олон компани саналаа өгч, нийслэлээс томилогдсон ажлын хэсэг санхүүгийн чадвар, ажиллах хүчний нөөц, хөрөнгө босгох чадвар зэргийг нь харгалзан үзэж 18 компанийг шалгаруулсан юм.

Тэдгээр компаниуд 7-хон хоногийн дотор иргэдэд компаниа танилцуулах гэж үзлээ, тухайн компанитай хамтран ажиллах үгүйгээ сонгох сонгууль хүртэл хийгээд амжлаа. УИХ-ын сонгуулийн дахин санал хураалт Сонгинохайрхан дүүрэгт болсонтой  зэрэгцээд дахин төлөвлөлтийг дэмжих санал хураалт хэд хэдэн байршилд болсон.

Тэр ч бүү хэл УИХ-ын сонгуулийн сурталчилгаа хийж буй мэт  буруу ойлголт иргэдэд төрүүлнэ гэж үзээд  тус дүүргийн дахин төлөвлөгдөх байршил болох Ханын материал орчимд санал хураалт явуулаагүй.

“Бодо Инвест” компани Ганданд төсөл хэрэгжүүлэх санал өгөөд, ажлын хэсгийн шалгуурыг давсан боловч иргэдтэй нэг хоёр удаа уулзаж, уур амьсгалыг мэдрэнгүүтээ төсөл хэрэгжүүлэхээс татгалзсан тул санал хураалтад оролцоогүй.

Ингээд дахин төлөвлөгдөх байршлуудын 16 багцад санал хураалт явагдсанаас  Ганданд төсөл хэрэгжүүлэх байсан хоёр компани иргэдийн дэмжлэг авч чадсангүй. Санал хураалтад оролцсон иргэдийн 50-иас дээш хувийн дэмжлэг авч чадвал хоёрдугаар шатанд шалгарах ёстой байлаа.

Харин хоёрдугаар шатанд шалгарч үлдсэн компаниуд дараагийн шатны ажил болох үл хөдлөх хөрөнгийн өмчлөгч, эзэмшигчдийн 75 хувьтай гэрээ хийх ажилдаа энэ сарын 8-наас эхлэн орсон юм.  “Буурал Сутай”, “Асар Өргөө” компаниуд  хоорондоо түншлэлийн гэрээ байгуулан  Хайлаастын 72 дугаар сургууль орчмын 15 га газарт төсөл хэрэгжүүлэхээр иргэдэд төслөө танилцуулж явна.

“Буурал Сутай”  компанийн ерөнхий захирал П.Дарамбазартай холбогдож сурталчилгааны ажил хэр яваа, иргэд ямархуу санал бодолтой байгаа талаар тодрууллаа.

                    

Газрын үнэлгээн дээр тохиролцоход хүнд байна

-Иргэдээс 75 хувийн дэмжлэг авах ёстой ажил эхлээд 10-аад хоночихлоо. Иргэдийн санаа бодол ямар байна? Тохиролцоход хүнд байна уу?

-Энэ бас шаггүй ажил байна шүү. Иргэдийн дийлэнхи нь дахин төлөвлөлтийг дэмжиж байна. Гэвч газрынхаа үнэн дээр тохирохгүй талдаа байна.

-Төрөөс үнэ ханш тогтоосонгүй. Гэхдээ компаниудын хэлж байгаа дундаж ханш хэдэн төгрөг байгаа бол?

-Ихэнхи компани ам метр газрыг 100.000 төгрөгөөр худалдаж авах санал тавьж байгаа боловч ам метрийг нь 250.000-300.000 төгрөг, бүр түүнээс дээш ч үнээр өгнө гэцгээж байна. Хайлаастад хашаа байшингийн  үнэ 15-40 сая төгрөг байсан гэж байгаа боловч одоо бүр явж өгсөн байна лээ.

-Иргэд дахин төлөвлөлтийн талаар хэр ойлголттой байна?

-Ямар ч ойлголтгүй хүмүүс их байнаа. “Луйварчдад газраа битгий өгөөрэй, та нарын газар тэрбум төгрөг болно гэж дарга нар хэлсэн” гэж ярих хүмүүс ч олон байна. Ер нь 30 хоногийн хугацаа гэдэг маш богино байна. Дээрээс нь сурталчилгаанд нийслэлээс дэмжлэг хэрэгтэй байх юм, компаниуд бор зүрхээрээ л явж байна даа.

-Газраасаа битгий салаарай гэчихээд, араас нь компаниудыг ажиллуулахаар явуулаад байгааг  би ч бас ойлгохгүй л байна.Танай компани гэхэд хэдэн удаа уулзалт хийв?

-Манай төлөвлөгдөх бүсэд 87 өрх айл амьдарч байгаа. Хажуугаар нь аж ахуйн нэгжүүд байна. Бид нэг бүрчлэн уулзсан. Одоо дараагийн уулзалтаа хийх гэж байна.

- Иргэдтэй тохирлоо гэж бодъё. Орон сууцаар солих, газраа шууд зарах гэсэн сонголтуудын алийг нь илүү сонгохоор харагдаж байна? Голдуу нам давхрын орон сууц баригдах уу?

-Хөрсний шинжилгээ авна. Тэгж байж хэдэн давхар орон сууц барихаа шийднэ. Ер нь амьжиргааны түвшин сайнгүй талдаа юм билээ. Тэгэхээр бас нэг их олон айлын орон сууц барих уу гэдгээ бодолцох хэрэг гарах байх. Иргэд газар, үл хөдлөх хөрөнгөө орон сууцаар сольчихно гэж байнаа. Гэхдээ газрын үнэлгээн дээр л тохироход хэцүү юм. Хаусанд орно гэх айл байна, шууд зараад явчихнаа гэсэн оршин суугч ч байна.

-Орон сууц баригдах хугацаанд иргэдээ хаана суурьшуулах санал тавьж байна вэ?

-Өөрийнхөө баригдаж буй байранд нэг хэсгийг оруулна, мөн түрээсийн байранд оруулах зэргээр тохиролцоно. Ямар ч байсан энэ ажлыг бариад авсан юм хойно эцсийг нь хүртэл үзнэ дээ гэж бодоод, зүтгээд уйгагүй явж байна.

-За баярлалаа. Ажлын амжилт хүсье.

                     

П.Болор

 

 

 

Бүх орон сууц
Шинэ орон сууцны
дундаж үнэ
Олон өрөө:
  • 1
  • 2
  • 3
  • 4
  • 5+
Санал асуулга
Орон сууцны үнэ цаашид...
© 2012 - www.shinebair.mnУлаанбаатар хотын бүх шинэ орон сууцны мэдээлэл